By Keeks Mc
Aw sakes, Ah think
Ah need tae book in fur ma MOT
afore the neist strike
oan the apocalyptic bingo caird
In ten year, will thase days o
“as per ma last email” drudgery
be halcyon
or the death knell o thase daurk ages
afore the new renaissance?
Whit will pairadise fur the youngers be?
Ivry meenit o ivry day?
Wee flashes?
Nivver?
Will thay steal a smuirich
– hert takkin flicht
in the orange glaw o a street licht?
Lie hauf baked
tryin tae debate
lyrical takes
oan bedroom flares
littered wi psychedelic rugs?
Mibbes thay’ll fin that sochten balance atween wurk an life fowk an erd
no seen in millennia
or will thay juist cairy oan
circlin back
lossin mair sicht o nirvana
wi ilk hivy paik?
Heaven forbid